Bjarte Tjøstheim debuterer med personleg soloframsyning

Alle opplever kjipe ting i livet, men Bjarte Tjøstheim går konstant rundt og fryktar at nettopp det som ikkje bør skje - skal skje. Og den som går med frykta, får som regel bekrefta at det er god grunn til bekymring. Som for eksempel da han fekk konstatert lungekreft - og hadde det i 24 timar - før det viste seg at det var ein annan sitt røntgenbilde.

Korleis kan ein leve av å vere komikar og utlevere seg sjølv - når ein inst inne er engsteleg av natur? I Bjarte Tjøstheims liv er sjølv dei mest kvardagslege tinga - som å gå i butikken - vanskelege. Han gruer seg kvar gong han skal gå ut av huset, og kjem garantert til å grue seg til kvar einaste framsyning.

TEATERDEBUT

Radioprogramleiaren, komikaren og skodespelaren Bjarte Tjøstheim teaterdebuterer med ei personleg og sjølvironisk framsyning om å leve med frykt for det aller meste. Den største frykta er likevel å bli galen og at psykiateren skal seie han er klin kokos. Men da han først blei innlagt, viste det seg at psykiatrisk avdeling var den tryggaste staden å vere.

HUMOR-TEAM BAK

Bjarte Tjøstheim er kjend for dei fleste gjennom P3-programmet Radioresepsjonen, der han i ei årrekke har vore i trekløver med brørne Sagen. Den yngre generasjonen kjenner han som faren i julekalenderen Julekongen. Han har også vore med i ein heil del andre radio- og TV-program, mellom andre Underholdningsavdelingen og TV-serien Presten på NRK. I 2014 vann han publikumsprisen som Årets morsomste under Komiprisen. Med Det går betre no debuterer han både på teaterscenen og som dramatikar. Bak han står ein annan moromann: Thomas Giertsen har lang erfaring både som skodespelar og standupkomikar på skjerm og scene, i tillegg til at han har regissert ei rad med sceneframsyningar og TV-program. Men det er første gong han er på Det Norske Teatret.

Les meir om Det går betre no på Det Norske Teatrets nettsider.

Få Broadway-nyheter på WhatsApp

Få de siste oppdateringene, nyhetene og eksklusivt innhold direkte i appen.